قصيدة(ابلياك ما اعيش)للشاعر (أيهاب المالكي)

السلام عليكم

اليوم جبتلكم وحدة من قصائد المبدع (أيهاب المالكي)
أتمنى تعجبكم



بلياك ما اعيش
اليكلك عشت بعيوني احلفك منه تاخذ حذر
آني اطمئن يمك واذا تبتعد
من كلشي يمي
آني احس بخطر
الليل يدري اشكد احبك لأن
وياك عيني تستلذ بالسهر
أذبل لحد ما أرتوي بشوفتك
جن سنبله الروح وعشرتك نهر
بلياك كلشي ايصير ما بي طعم
ما اميّز ابّين الورد والصخر
تمطر ترافه واني اخضّر غزل وبكاع جفي قلمي يطرح ثمر
لو راد ياخذني القدر كلي الك
بس لا ابّيني وبينك ايمر قدر
علمت روحي من زغر شوفتك
ردتك صدك تبقه نقش عالحجر
تشتاكلك عيني اذا سافرت
شوك النوارس من ترد للبحر
آنه شسوي بالنظر لو رحت
من تمشي كلي حتى اضمّه النظر
ما ادوّر ابحبك خساره وربح
ما افكر بكلبي ربح لو خسر
كل اليهمني اني احبك فقط
حب لونه صافي ابيض امن الكمر
طير انت من مرّ ابسمه دنيتي
وكّر على روحي وعليهه استقر
يسكت غصن خلكي كبل لا تجي
ينتظرك الريح التحرك الشجر
بلياك كلشي ايصير ما بي نفع
شيفيد كلي الغيم البلا مطر
عين الأشوفك بيهه احس تختلف
مو نفس عيني البيهه اشوف البشر
مرات احّجي صورتك عالورق
من اخلط احساسي اويه لون الصور
إمشي بحياتي وإمعن بخطوتك
حتى امن اتيهك عالأقل ألكه اثر
آنه امن اعوفك جدمي يمشي ابثكل
ثكل الجدام المالّه امن السهر
ومن تمشي عني الكون احس يختنك
والعالم ابكبره أحس بي زغر
بس لمن اتردلي أرد اكتشف
كلشي ابمكانه وانت حبك كبر